ليوم غادي ناقشو اكبر مشكل كايعاني منو المقبلين على انشاء مشروع فلاحي لي هو تدبير رأسمال و عقلنة التسيير في بداية المشروع..اولا الفلاحة مهنة شريفة و مربحة و كاين لي غايقول العكس و كاين لي ساخط و باع لبلاد و مشا المدينة و و و...مقالي اليوم موجه لواحد الفئة من ناس لي باغيين يستثمروا فالفلاحة كنشاط ثانوي للزيادة من الارباح و ناس اخرين لي طاجيين من المدينة و باغيين يستقروا بالبادية و ضمان الاستقرار المادي و المعنوي و ناس لي كايوجدو للتقاعد و باغيين يكملو حياتهم بالبادية..الفلاحة كاتعاني من عدة اكراهات كما في المجالات الأخرى و شيء عادي بحكم ان ماكينش دراسات و ماكينش دراسات سوق و تدبير مخاطره وماكينش حتى الصبر و كذلك مشكل تثمين المنتجات الفلاحية لي مزال كاتعاني منو المملكة...ملي تبدا المشروع الفلاحي و قبل حتى ما تفكر فالمشروع خصك تبع النصائح التالية:
- نعرف شنو المعطيات لي عندي نحطهم قدامي يعني تجهيزات و المباني المتوفرة حيت هي اساس توجه في اختيار المشروع المطلوب
- التواصل ثم التواصل يعني نخلق مجموعة من العلاقات المباشرة مع ناس لحرايفية في المجال و الحمد لله الصفحة هي ملتقى لاعضاء محترفين باش نكون واحد المعلومات واخا غير سطور عريضة حول المشاريع غرضي ماشي هو المعرفة بالدرجة الأولى ولكن نخلق روابط ثقة مع دوك ناس لي غانتعامل معاهم طوال مشواري المهني في المجال لان راس المال الحقيقي في الحياة هو العلاقات....
- نتوجه للمؤسسات الفلاحية و نعرف دور كل مؤسسة و من بعد ندير راسي مكلخ و ندخل نقصدهم مكتب بمكتب و ذلك لمعرفة ما لك و ما عليك و كذلك نعرف شنو هوما المشاريع المدعمة و من بين المؤسسات (مكتب جهوي للاستثمار الفلاحي-مديرية الفلاحة-مركز الإستشارة الفلاحية) و هادشي من حقك كمواطن فلاح...و مزال كانأكد على تواصل يعني نحاول نجمع أكثر كم من المعلومات و ارقام الهاتف...
- ثلاثة عشرانك غايبقاو معاك حتى تنجح مشروعك و هوما (الورقة و ستيلو و الٱلة الحاسبة لي فتيليفونك ههه) دزتي مراحل التواصل و جمع المعلومات دابا غاتريح مع عشرانك و غاتحط الميزانية لي باغي تنزل ليها فالمشروع
- الفلاحة ماشي هي قهوة مثلا ولا حانوت غاتبدا دخل من شهر الاول لا...الفلاحة مشروع لي غاتبدا تصرف فالاول حتى طييييب بحال البني يعني كاتعول على ميزانية كاتخرج بأكثر ولكن كاين الحل و هو (لا تدع كل البيض في سلة واحدة) يعني تقسم الميزانية على ثلاثة أنواع مشاريع كل مشروع كايكالي من جهة:
* مشروع قريب المدى: هو مشروع غالبا دو ميزانية بسيطة و لي غاتبدا دخل منو على الاقل مصاريفك الضرورية الشهرية(مازوطك قهوتك روشارج...)و مصاريف الخدام..مثل تربية الأرانب-واحد 500دجاجة-شي 5000متر نعناع قزبر معدنوس الخ...غايبانو ليك بساط لكن را حتى 200درهم فنهار كمصروف لا ضربتيها فشهر را ماساهلاش...يعني خصك باش تحلق على الوقت بينما نجحتي المشاريع الكبرى في الزمان و المكان...
*مشروع متوسط لمدة: هنا كانهضرو على عام اي مشروع لي غاتبدا دخل منو لگاميلة مجموعة فيه ربح سنوي و نفس الوقت كاتكبر بيه راسلمال و ماكيخليكش تمل حيت عندك مشروع قريب المدى باش كاتجيب مصاريفك..مثلا تربية الغنم-تسمين العجول..كاتعطيك أمثلة غير للتوضيح اما را كل حاجة و تاويلها..
*مشروع بعيد المدى: لي هو الدقة الصحيحة و غالبا متعلق بالتشجير مثلا او الابقار الحلوب لي حتى هوما ماكيبدا يبان ليك الرباح حتى للسنة الثالثة الخ...
- هاد التقسيم هو اولا كايخليك تحط ميزانيتك بشكل عقلاني و نفس الوقت كايبان ليك فين تقدر تستثمر كأبعد مدى يعني ميزانيتك واش محصورة فأول صنف من هاد المشاريع و لا ثاني و لا ثالث و لا كلهم فدقة وحدة و نفس الوقت كادور فلوس Fond de roulement ماشي صرف صرف صرف لمدة طويلة و لا قدر الله خسرتي ضاع لك الوقت و الجهد و عمر (راسلمال)...
- قاعدة للاستثمار: كايقولك اجتناب اي مصاريف زائدة (لاشريتي شي حاجة مامحتاجهاش ممكن واحد نهار تبيعك شي حاجة محتاجها...)يعني باختصار في بداية المشروع ضروري من زيااار فالجيب لا عندي بقرة و كاتاكل 50درهم فنهار و هي لي عندي فجيب ناكل حدااها انا غا الخبز و اتاي و ماعليش نصبر حيت فٱخر المطاف را البقرة و 50درهم و الخبز و اتاي راهم رزقي و راسمالي كانكبر فيه..
-اعادة الاستثمار: ضروووري نفكر فإعادة الاستثمار و لي هي نسبة سنوية كانحطها كهدف باش نكبر المشروع و غالبا 10% من الربح كافية باش نزيدها كاستثمار فالمشروع..ماشي ندخل فريح كامل و العام لي جا يلقاني كاناكل فالخبز و اتاي ههه و الفاهم يفهم...
- نرجعك لأول نقطة و هي التواصل هادوك ناس لي تعرفتي عليهم ماننساهمش قهوة مور قهوة واتساب فيسبوك عواشر مبروكة عيد سعيد...دابا خصني نكون وصلت معاهم لعلاقات صداقة مبنية على الثقة و روح التعاون من بعد تأسيس مشروعي يعني مع هادوك ناس غانزيد القدام غانعرف السوق غانعرف عن طريقهم ناس اخرين و بهاد العملية كانكبر دائرة المعرفة و الصداقة و بهدا ماكيصعابش علية نبيع منتوجي ولا نزيد نكبر مشروعي ولا نعرف قوالب الحرفة و زيد و زيد...
- نحاول ما أمكن نبعد على مصادر الربى و القروض لانها اول عائق في المشروع و كأنك تحارب الله من الجهة الدينية...و حتى من الجهة التدبيرية كاتبقا مشنوق و كادور بلاصتك حيت غاتخليك تفكر تربح دغيا و بأي وسيلة باش ترد القرض و هنا شيطان كايفصل بينك وبين الله وغايولي عندك الربح بحال نفاخة ملي كاتقيصها بصبعك كاتزيد طير ...نحاول نقلب على مصادر دعم كاين المبادرة الوطنية للتنمية البشرية كاين جمعيات كاين مكتب الاستثمار الفلاحي و حتى هادو راك واحد نهار دقيتي بابهم و جمعتي الارقام ديالهم كيما وصيتك فالاول قبل مانبداو المشروع و لي حتى هوما غاتكون طورتي معاهم العلاقات...و الله ولي التوفيق
شعارنا دائما: جميعا يد في يد من أجل مغرب أخضر...
رياض وحتيتا: مهندس دولة في التكوين
رئيس جمعية عالم الفلاحة التضامنية القروية لجهة الدار البيضاء سطات
